Alang sa pagpalambo ug mas mapadayag ang importansya sa Project SARAI CeNTRO sa sektor sa agrikultura, misalmot ang DOST Caraga sa usa ka radio guesting sa Bahandi sa Kaumahan nga programa niadtong Pebrero 2, 2026.
Ang maong programa gipanguna sa Department of Agriculture (DA) Caraga pinaagi ni Mr. Aurell Arais, Program Anchor, diin nakig-istorya kang Engr. Noneth Labastilla, Project Technical Specialist III sa DOST Caraga.
Sa guesting, gihisgutan ang kinatibuk-ang katuyuan sa Project SARAI CeNTRO ug giila ang nagkalain-laing SARAI technologies ug systems nga gilaraw aron matabangan ang mga lokal nga pangagamhanan (LGUs), labi na ang mga mag-uuma, sa pagpausbaw sa produksyon ug mas epektibong pagdumala sa uma.
Gipatuman ang proyekto aron madala ang kasaligan nga impormasyon, datos, ug teknolohiya duol mismo sa mga mag-uuma, aron ang ilang mga desisyon sa uma magpundar sa siyentipikong basihan.
Gilatag ni Engr. Labastilla ang nagkalain-laing teknolohiya nga sakop sa proyekto, lakip ang Automatic Weather Station (AWS), Community Level-SARAI Enhanced Agriculture Monitoring System (CL-SEAMS), mga mobile applications, SPIDTECH, BanaTech, ug ang SARAI Knowledge Portal.
Nakighimamat usab si Engr. Labastilla ug PTA III Mr. Lembert Neil Ayta kang Ms. Emmylou Presilda, Chief sa Agriculture and Fisheries Information Section sa DA Caraga, aron mas lig-on ang kolaborasyon sa paghatag og impormasyon sa sektor sa agrikultura.
Pinaagi sa maong radio guesting, tumong sa DOST Caraga nga mas mapaabot ang siyensya, teknolohiya, ug inobasyon nga adunay dakong kaayohan sa mga komunidad, ilabi na sa sektor sa agrikultura.
Dugang pa, kini nga inisyatiba nagtinguha nga ma-edukar ang mga Caraganon bahin sa Project SARAI CeNTRO ug maghatag og kahibalo kon unsaon nila makigkoordinar ug makapahimulos sa mga teknolohiyang gihatag sa proyekto.
Comments are closed, but trackbacks and pingbacks are open.